ജോമോന്റെ അച്ഛനും അമ്മയും അവന്റെ ചെറുപ്പത്തിലേ പിരിഞ്ഞു. അവനും അനിയനും വല്യമ്മയുടെ സംരക്ഷണത്തിലാണ് വളർന്നത്. വല്യമ്മയ്ക്ക് സഭക്കാർ വെച്ചുകൊടുത്ത വീട്ടിലാണ് ഇരുവരും താമസിച്ചത്. വല്യമ്മ ഇന്നില്ല. ഇവരുടെ പേരിൽ സ്ഥലവുമില്ല. വീടിന് വല്യമ്മയുടെ മറ്റു മക്കളും പേരക്കുട്ടികളും അവകാശികളായുണ്ട്. വീടിനു പുറത്തൊരു ഓല ഷെഡ് കെട്ടി അതിലാണ് ജോമോനും ഭാര്യയും രണ്ടു കുട്ടികളും താമസിച്ചിരുന്നത്. ഈ മഴയിൽ അതുകൂടി ഇല്ലാതായി. അനിയനോടൊപ്പം വല്യമ്മയുടെ വീട്ടിൽ കയറി താമസിക്കുകയാണ് ഇപ്പോൾ. സ്വന്തം പേരിൽ സ്ഥലമില്ലാത്തതുകൊണ്ട് സർക്കാർ ഫണ്ടിൽ നിന്ന് യാതൊന്നും കിട്ടില്ലെന്ന് സന്ദർശനത്തിനു ബ്ലോക്കിൽ നിന്നു വന്ന ഉദ്യോഗസ്ഥർ പറഞ്ഞത്രെ. സ്ഥലമില്ലാത്തവർ എവിടെ വീട് വെക്കും ? എന്നാൽ ആദ്യം അവർക്ക് സ്ഥലം കൊടുത്തൂടെ !
സങ്കടങ്ങൾ പറയുമ്പൊ അജിത്തിന്റെ ഭാര്യ കരയുകയായിരുന്നു. എന്തു പറഞ്ഞ് ആശ്വസിപ്പിക്കണമെന്ന് അറിയില്ലായിരുന്നു. എന്തെങ്കിലും പറഞ്ഞാൽ ആശ്വാസം കിട്ടുമോ എന്നും.